魚罾仔 hi-tsan-a 是一種掠魚的籗仔  khah-á，入口較大，親像漏仔，予魚仔好勢趖入來，歹勢走出去。 一般攏用竹篾仔編製，亦有用其他材料，譬如藤條，亞麻等製成。魚罾仔是咱人使用數千年的掠魚方式。 世界各地的人攏慣習使用魚罾仔，但是外觀和稱呼各地無仝款。南島民族的魚罾仔形式差不多，稱呼嘛相倚。

 

各種水域攏會使用魚罾仔來掠魚，包括溪流，埤，潭，海邊不等。若是細條的溪仔，就先抾石頭，抑是挖塗來造壩，予水流變狹，然後魚罾仔囥佇水流的所在。順着流水，魚蝦就家己入去魚罾仔內矣。若是埤，潭，內海，魚罾仔愛硩石頭予伊沉底，魚罾仔內愛囥魚餌, 閣愛縛一个浮筒作標記。這種掠魚的方式，號做放罾仔。

佇台灣佮馬來群島真濟族群的魚罾仔攏號做 “bubu”, 抑是 ”bobo, buebu, vovo” 遮个相倚的音。毛利語的魚罾仔號做 “hinaki”, 佮台語仝款，”hi” 的意思就是魚。“naki” 意思是趖入去。

 

用魚罾仔掠魚是一種真環保的方式，永遠保持食物的供應。南島民族的祖先至少 5000 年前着按呢用矣。彼當時的人，會曉編製佮使用魚罾仔是真重要的生活技能。毛利人的風俗，若是掠著魚，攏愛分予伊的厝邊享用。