人類佮其他動物無仝的所在就是皮膚的毛真少。 所以人亦號作 “無毛猿”。 若是按呢人欲按怎對抗寒冷的天氣？ 為了保護無毛的身軀，人類佇古早就用其他動物的皮毛來做這个用途。現此時，棉布的使用真普徧。 但佇發現棉仔花以前，咱的祖先用啥麼物件來達到這個目的？ 拍布是其中一個答案。 佮棉仔布比較，拍布無需要編織，材料真簡單得會著，製作布料的技術亦無棉仔布遐爾仔複雜。

 

拍布的製作，原料是紙桑樹（Broussonetia papyrifera), (閣號作構樹，鹿仔樹)，剝落來的樹皮。 然後經過複雜閣厚工的過程，共樹皮浸入水內軟化，然後捶拍，一直到賰一片一片的纖維，然後共纖維片一層一層用粉漿共黏倚起來。這個過程所用的工具號作拍布槌仔 (Tapa Beater)。拍布槌仔有兩種，柴做的佮石頭做的。 但是到目前為止，干旦石頭拍布槌仔才有可能留落來，而且閣予考古學家發現。 上早的石頭拍布槌仔是佇亞洲東部發現，歷史可以追溯到 6600 年前。 若是佮 2200 年前中國栽培棉仔的歷史比較，咱會當確定佇棉仔以前，拍布就是人類用來做衫的材料。 歷史表明，古早人使用拍布的歷史超過 5000年。

 

根據地質學的研究，頂一擺的冰河期 11,400 年前結束。 此後，福爾摩沙（現台灣）島嶼佮亞洲大陸分離。 南島人隨後分做兩个族群，一族在福爾摩沙，另一族在長江流域。 兩族攏有拍布文化。 由此可以推斷，南島人使用拍布的歷史可能比 11,400 年前閣卡早。

世界各地使用拍布的地區包括太平洋各島嶼，雲南，海南，越南和烏干達。 其中斐濟，夏威夷，薩摩亞和東加，遮个南島人製作拍布的技術上蓋先進。 拍布已經成做南島文化的特色。斐濟航空公司甚至用拍布的花樣，來塗装飛機的內部和外部。

拍布的主要來源是紙桑樹，這種樹佇南亞和東亞有自然分布，範圍對西邊的阿薩姆到東邊的台灣。 閣再向東，其他太平洋島嶼亦有種紙桑樹，毋過這是南島人遷移所紥來的，並不是自然的分布。 遮个旅程是透過船隻佇海上進行的長途旅行。

 

紙桑是一種公母無仝欉的植物，這表示公花和母花分別發佇無仝欉的樹仔頂懸。 太平洋群島，大多數紙桑樹攏是單性的，而且生長佇無仝的島嶼頂頭。太平洋紙桑干旦會當透過插枝抑是分欉來增殖。所以太平洋紙桑的 DNA 會當保持原樣，可能數千年攏無改變。

 

根據最近一篇論文 “透過太平洋紙桑樹的系統地理學所顯明的南島民族遷徙的完整概念”，發現台灣佮太平洋島嶼的紙桑樹 DNA 是仝款的。 由此可見，南島民族的祖先對台灣來的 “出台灣說” 理論得着更加有力的支持。 彼當時，南島人的祖先五千年前離開福爾摩沙前往太平洋群島，紙桑的樹仔栽可能是 in 所紥的物件裡面真重要的一項。若是有紙桑的樹仔栽，就有布料的來源。

夏威夷人佮毛利人的歷史有講起，一千外年前， in 的祖先坐船來的時陣，有紥一寡有路用的植物。 遐的植物號做 “獨木舟植物”。 紙桑樹就是其中的一種。真明顯，大洋洲的紙桑是人引進的，並毋是本來就有的。數千年來，紙桑佇太平洋各島嶼生湠，閣替所有南島人提供了豐富又多彩的拍布文化