July 18, 2018| DAIGU SIGUA
台 文 翻 譯
咱 必 須 應 戰
雷根總統演講
即馬咱講實在的。若是佇戰爭佮和平兩項來選擇，真濟人會選和平，而且有一个方法予咱會當馬上得著，恁若投降，著會當即刻得着和平。
無可否認，除了這點，任何的路線攏有風險，歷史的教示予咱明白，上蓋大的風險就是讓步。這是軟心的自由派朋友毋敢面對的烏暗面 - 遮的人的計策就是軟汫及讓手。佇戰爭及和平中間無別項選擇，咱干旦會當選擇應戰抑是投降。咱若是繼續軟汫，繼續讓手，歸尾咱嘛是會拄著敵人的要求 - 最後通牒。若按呢，Nikita Khrushchev 就會共伊的百姓講，伊知影咱的想法是啥物，伊會講，在冷戰的壓力下跤， 咱當咧倒退，見著最後通牒，咱著會自動投降，因為到彼个地步，咱的精神，道德和經濟攏變荏弱矣。伊會按呢想，著是因為伊對咱遮聽著的聲音，佇共伊姑情 “無惜任何代價的和平 ” 抑是 “予人赤化總比戰死較贏”，抑是，親像一位批評者所講的，伊甘願 “跪矣活亦不願徛矣死”。著算按呢講無毋著，嘛是袂當避免戰爭，因為這个聲音並無代表咱遮个想法無仝的人。
咱攏知影，而且亦毋相信，生活敢是遮爾仔珍貴，和平敢是遮爾仔甘甜，會值得用鎖練及做人奴隸的代價來交換。若是性命無任何物件值得為伊來死，若是按呢，咱共敵人面對的時陣是欲安怎辦？抑是，摩西應該吩咐以色列的囝兒繼續佇法老的統治之下做奴隸？基督是毋是應該拒絕十字架？Concord橋頂的愛國者是毋是應該共槍擲掉，抑是拒絕開槍，莫予世界別位所在聽到遮的槍聲？歷史的殉道者不是戇人，遐的為了阻擋納粹的擴張來獻出性命的榮耀戰士，遐的人的犧牲並毋是枉費。若是按呢，和平的路途何在？諾，這个答案真明矣。
咱著心頭掠予伊定，對咱的敵人講予伊清楚：“阮的底線佇遮，恁一步都袂使超過” 。Winston Churchill 講：“人類的命運毋是用物質來量的。當世界的大局變動的時陣，咱就會明白，咱是屬靈的 - 並毋是屬肉體的。” 他講，“時間佮空間攏佇變化，無論咱欲接受抑是毋接受，攏愛盡咱的本分。”
咱佮命運有一个約束。
咱愛替咱的後代保留這个人類上煞尾的向望，若無，會逼遮的人踏出最後的一步，煞尾跋落去烏暗的無底深坑。
雷根演講視訊及原文講稿全文 （本篇干旦翻譯上煞尾七段）
台語資源網站：